अकलूज येथे राज्यस्तरीय लेझीम स्पर्धेला आजपासून प्रारंभ
संचार वृत्त अपडेट
संग्रामनगर (केदार लोहकरे यांजकडून)
संग्रामसिंह मोहिते पाटील मित्र मंडळ व शिक्षण प्रसारक मंडळ अकलूज यांच्या संयुक्त विद्यमाने दि. ९ ते ११ जानेवारी २०२५ या कालावधी साठी आयोजित केलेल्या १९ व्या भव्य लेझीम स्पर्धेला मोठ्या दिमाखात प्रारंभ झाला.
विजय चौक येथे अकलूज बाजार समितीचे सभापती मदनसिंह मोहिते पाटील यांच्या हस्ते मैदान पूजन व अकलूज पोलीस ठाण्याचे पोलीस निरीक्षक भानुदास निंभोरे,सह निरीक्षक विश्वास साळुंखे यांच्या हस्ते दीप प्रज्वलन करून स्पर्धेला सुरुवात झाली.
यावेळी सहकार महर्षी साखर कारखान्याचे चेअरमन जयसिंह मोहिते पाटील,मित्र मंडळाचे अध्यक्ष संग्रामसिंह मोहिते पाटील,दिपक खराडे- पाटील,प्रदीप खराडे-पाटील, रामचंद्र सावंत पाटील,ॲड प्रकाश पाटील,महादेव अंधारे,रावसाहेब पराडे, अभिजीत रणवरे,हर्षवर्धन खराडे-पाटील यांचे सह सहकार महर्षी कारखाना,शिक्षण प्रसारक मंडळ व परिसरातील विविध संस्थांचे आजी-माजी पदाधिकारी मोठ्या संख्येने उपस्थित होते.
यावेळी मदनसिंह मोहिते पाटील मार्गदर्शन करताना म्हणाले की,जयसिंह मोहिते पाटील यांनी लेझीम खेळाला प्रोत्साहन दिले.ही ग्रामीण खेळाची परंपरा जतन करून वाढवण्याची भूमिका घेतली. मोबाईल आणि टीव्ही मुळे मुले मैदानावर खेळत नाहीत.परंतु संग्रामसिंह मोहिते पाटील मित्र मंडळांने मागील १९ वर्षापासून लेझीम स्पर्धेच्या माध्यमातून ही परंपरा सुरू ठेवली आहे.हे कौतुकास्पद आहे.लेझीममुळे शारिरीक तंदुरुस्ती वाढते. अकलूजचा लेझीम खेळ व स्पर्धा राज्याला आदर्शवत आहे. संग्रामसिंह मोहिते पाटील, स्वरुपाराणी मोहिते पाटील व सयाजीराजे मोहिते पाटील हे या स्पर्धेसाठी काम करत असल्याचेही त्यांनी सांगितले. सह.पोलीस निरीक्षक विक्रम साळुंखे म्हणाले की,मित्र मंडळांने स्पर्धेच्या माध्यमातून सुमारे ६० हजार खेळाडू तयार केले.या खेळाची गिनीज वर्ल्ड ऑफ रेकॉर्डमध्येही नोंद झाली. येणाऱ्या पिढीला हा सांस्कृतिक वारसा प्रेरणादायी ठरेल.
स्पर्धेचा प्रारंभ प्राथमिक गटातील सहकार महर्षी शंकरराव मोहिते प्रशाला वेळापूर संघाने आपला खेळ सादर करुन झाला.
तीन दिवसात या स्पर्धेमध्ये प्राथमिक ५, मुले २३ व मुली २७ असे एकूण ५५ संघ आपला खेळ सादर करणार आहेत.सूत्रसंचालन किरण सूर्यवंशी
, शकील मुलांनी यांनी केले.
या स्पर्धेसाठी प्रथम क्रमांकास रुपये ५ हजार,द्वितीय क्रमांक ४ हजार,तृतीय क्रमांकास रुपये ३ हजार व सन्मान चिन्ह याचबरोबर उत्कृष्ट प्रशिक्षक,उत्कृष्ट हलगी वादक, उत्कृष्ट घुमके वादक,उत्कृष्ट सनई वादक यांना देखील स्वतंत्र बक्षीस देण्यात येणार आहेत. मंडळाच्या वतीने प्रत्येक संघास मोफत भोजनाची सुविधाही देण्यात आली आहे.
