मोहीते पाटील यांच्या विरुद्धचे पक्षविरोधी कारवाईचे प्रकरण संपुष्टात ?
संचार वृत्त अपडेट
राज्यात मागच्या वर्षी झालेल्या विधानसभा निवडणुकीत भाजपने मोठे यश मिळवले. विधानसभा निवडणुकीत भाजप नंबर एकचा पक्ष ठरला. पण, सोलापूर जिल्ह्यातल्या माळशिरस विधानसभा मतदारसंघात तत्कालीन भाजप आमदार राम सातपुते यांचा पराभव झाला होता. तसेच त्यापूर्वी त्या भागातील माढा लोकसभा मतदारसंघातही भाजपला पराभव सहन करावा लागला.या दोन्ही निवडणुकीतील भाजपच्या पराभवाला पक्षाचे विधान परिषद आमदार रणजितसिंह मोहिते-पाटील जबाबदार असल्याचे मत भाजप कार्यकत्यांनी व्यक्त केले होते. सातपुते यांनी तर तशी उघड तक्रारही केली होती. त्यानंतर रणजितसिंह मोहिते-पाटलांना
पक्षाने कारणे दाखवा नोटीसही बजावली.
पण, याच आमदार मोहिते-पाटलांवरील भाजपचा राग मावळला आहे का? अशी चर्चा सोलापूर जिल्ह्यात सुरु झाली आहे. भाजप प्रदेशाध्यक्ष चंद्रशेखर बावनकुळे यांनी रणजितसिंह मोहिते-पाटलांचे कौतुक लेखी पत्रातून केले आहे. भाजपची एक हजार सदस्य नोंदणी केल्याबद्दल बावनकुळे यांनी हे कौतुक केले आहेत. आपल्या समर्पित योगदानाबाबत पक्षाध्यक्ष म्हणून आदर आणि अभिमान वाटतो, या शब्दात बावनकुळे यांनी आमदार मोहिते – पाटलांची प्रशंसा केली आहे. बावनकुळे यांचे हे पत्र सोशल मीडियावर व्हायरल झाले आहे. मोहिते- पाटलांना ई-मेलवरुन भाजपचे हे पत्र मिळाले आहे. पक्षाने नोटीस बजावल्यानंतरही रणजितसिंह मोहिते-पाटलांचे कौतुक करणारे पत्र पक्षाने त्यांना पाठवले आहे. त्यामुळे मोहिते-पाटील यांच्या विरुद्धचे पक्षविरोधी कारवाईचे प्रकरण संपुष्टात आले आहे का ? अशी चर्चा सुरु झाली आहे.
